MZUZU--Banthu abo bakiba ndalama zakukwana MK27 miliyoni ku National Bank mumsumba wa Lilongwe bakoleka.

Kwakulingana na mlala wa bapolisi mumsumba uwu ba Casper Chalera, banthu aba bakiba pa National Bank ya pa Crossroads mumwezi wa April chaka chenechino. Bapolisi bakolapo bankhonde mwa banthu bankhonde na babiri abo bakaswa banki iyi.

Mwa banthu abo bakoreka, pali mlonda yumoza wa G4S, Paul Garnet, uyo wakaba pantchito pa banki iyi dazi ilo unkhungu ubu ukachitikira. Munthu uyu wazunula kuti bankhungu bakapangana kumupako K3 miliyoni usange vyose vyenda makora.

Chabakoreska banthu aba nkhaguliro ka vinthu mwaumataya ako bachita panyengo yichoko waka.

Awo bakubamanya makora banthu aba bati, panyengo yichoko waka banthu aba bagula basi yimoza yakukwera banthu 26, matuling’i ghatatu, na katundu wakupambanapambana munandi uyo bakamugula na ndalama zinandi mwambula kwenerera.

Kusazgira pa Garnet, banyakhe ni Masautso Kalua wa ku Dedza, Pilirani Frazer wa ku Lilongwe, Lusticko Chifomboti wa ku Lilongwe na Edi M’madi wa ku Mangochi.

Bose banjirenge mukhoti sonosono apa kuti bakazgole mulandu wakuswa banki na kwiba ndalama.