MULONGOZGI wa charo chino Bingu wa Mutharika, wayowoya pakweru kuti ivyo balikupangana ba wupu wa PAC (Public Affairs Committee) vyakuti iyo wathule pasi ulongozgi, vyambula na mchere wuwo.

Pakuyoboya pa ungano wachisanisani uwo wakachitiska mu boma la Mangochi madazi ghajumpha agha, Mutharika wakati iyo wangachita chara ving’unu ivyo ba PAC bakukhumba chifukwa wakasoleka na banthu bose bacharo chinu.

Iyo wakati wafiskenge nyengo yose ya mubuso wakhe mpaka mu 2014. Paungano wenebuwo, Mutharika wakayowoyaso kuti chipani chakhe cha DPP chiwusenge mpaka chichite kuvuka chekha.

Ungano uwu bukaba wakukumbukira kukhumbikwa kwa maji mucharo chose cha pasi, ndipo ukaba wa chipani chara.
Mutharika waneneska kuti iyo wakuchimbira nesi kulekera panthowa mlimo wakhe chara.

Mukuyoboya kwakhe wakati: “Uthenga wane ngwenewuwu ndipo ulute ku PAC, ma wupu ghakwimira banthu, na bavipani vyakususka boma, nizamuzgolaposo chara, kwene bamanye pakweru kuti Ine nicharipo mpaka 2014 wooo!
Ndipo mlongozgi uyu wakalangulaso wayilesi ya sinema ya TVM kuti ivyo wayoboya bakapereke ku mabupu agha.

Fumbo ilo banthu bakufumba ndakuti kasi zgolo lakuperekeka mwamtundu uwu ndantchindi?

Tikumanya chara ivyo wupu wa PAC uchitengepo kwene tileke kuluwa kuti ni wupu wenewuwu uwo wukabuskapo Kamuzu pa mpando na kutondeska Muluzi kuti walutirire kuwusa nyengo yakhe yikati yamala.