The Maravi Post

LILONGWE--Nyengo zinyake banthu bakughanaghana kuti basambiri nga ba pa Bunda College bakutandala waka mukalasi, kuleka kuchita vinyake na vinyake.

Unenesko ngwakuti basambiri aba bakupanikizga kuti kuti balimi awo bakovwirana nawo pa ulimi baliso na vyakusoba vinyake pa umoyo.

Basambiri ba pakoleji iyi madazi ghajumpha agha bakapereka wovwiri ku wupu wakupwelelera bana balanda wa Chitenga Orphan Care.

Nangauli kupwelelera bana balanda ni lwande lumoza chara la kafukufuku, vikalongora kuti banyamata awo bakwendakwenda mumizi yakuzingilira sukulu yawo bakuwonaso uwemi wakovwiraso balimi munthowa zinyake na zinyake mwantheura kovwira kuti kafukufuku wende makora muchigaba ichi.

Masautso Chikuwi, uyo wakalongozga gulu la basambiri banyake, wakati pakaba chimwemwe na kusangwa pakati pa bana apo wupu wa Bunda Students Anglican Society (Busa) ukakabachezgera. Basambiri awa bakanjilikizgaso wupu wa Chitenga pa ulimi wa vibeto.

Basambiri awa bakapereka katundu wa K16,500 kusazgapo mafuta ghakuphikira na kuphakara, sopo yakuchapira na kugezera, shuga na mchere.

Vincent Chilombe uyo na mlongozi wa Busa, wakati basambiri awa bakaghanaghana vyakovwira wupu wa Chitenga Orphan Care chifukwa uli pafupi na sukulu yawo. Malo agha ghali pa mtunda wa makilomita 8 kufupa ku Koleji ya Bunda.

George Masache, uyo ni mlala wa wupu wa Chitenga Orphan Care, wakawonga basambiri awa chifukwa cha wovwiri uwu kweniso wakati kwiza kwa basambiri ba Busa kubalimbikiskenge bana ba pamalo agha pa masambiro ghawo.

Masache wakati malo agho bakaghajulira m’chaka cha 2007 na wovwiri wa ndalama zakukwana K1,770,000 kufuma ku Malawi Social Action Fund (Masaf) ndipo zinyake mwa ndalama izo bakagwiriska nchito kuzengera vibaya vya ng’ombe, kugula ng’ombe  6 kweniso kugulira manotibuku na vyakuvwala vya bana balanda muchigaba ichi.

Bupu wa Unicef nawo ukovwirapo na mawisikiti, makapu na mapoto.

Malo gha Chitenga Orphan Care ghali na bana bakujumpha 300 ndipo Masache wakati bakukumana na masuzgo ghakupambanapambana ngakupelebera kwa wisikiti, chakurya chakwenera kwa bana banyake awo bali na kachibungu kakwambiska matenda gha Edzi, vyakudika, manotibuku na vyakulembera.

Ndipo paumaliro Masache wakupempha mawupu na banthu bose kuti bawovwire nga umo bakachitira ba Masaf na Unicef.