The Maravi Post

BLANTYRE--Kufuma apo Pulezidenti Joyce Banda wakati waka kwere pampando wa ulongozgi wa charo chino mu mwezi wa Epulero chaka chino, wakakamba kusintha fundo zinandi izo mlongozgi wakale, chiponde Bingu wa Mutharika, wakendeskeranga boma.

Enya, muvinandi tingati Mama Banda wakaneneskanga chifukwa apo charo chikafika pambere Bingu wandafwe kuti ndimo chilutilirenge na sono nga mayi kuli uli—panji sono mpa charo chazgoka nga ni Sodom na Gomorrah!

Tikuluwa yayi umo banthu bakasuzikiranga chifukwa cha kusoba kwa mafuta gha galimoto; ninjani wangaluwa za kusowa kwa ndalama zakuwalo (forex); kukomeka kwa banthu na bapolisi pa 20 na pa 21 Julaye; uli malango ghaheni ghakukhumba kufyenyekezga bina Malawi? Vinandi waka vikendanga makora chara mu muwuso wa Bingu.

Kweni bakuti munthu waliyose wali na uwemi na uheni wakhe. Palije uyo wali nyolonyolo nga khuni la mukama. Bingu sono tikumukumbuka chifukwa mazgo agho wakayowoya apo unkhungu wakwiba na futi ukamba kufika panyakhe mucharo chino.

Wakati: “Bapolisi, nkhumulangulani kuti pala mwasanga munkhungu wafuti, lasani waka na kutolera papo! (Shoot to kill armed robbers).”

Chifukwa cha mazgo agha, bankhungu bakamba kopako ndipo vyakwibirana vikamba kuchepako nadi.

Soka ilo! Ba Joyce Banda bakati waka kwere pachitengo, mazgo ghakwamba ghakaba ghakuti:

“Ningapulikangaso cha kuti bapolisi bakulasa banthu na futi, kwali ngwakwiba, kwali ni munthu uli.”

Pakupulika mazgo agha, bankhungu bakati waka holoholo, mwabi withu asi ni uwu! Pakajumpha na nyengo wuwo yayi mbwenu banthu bamba kulira—ine banibira katundu; banyakhe kutimbika na vigebenga; banyakhe kukomeka na kukomeka wuwo pachanya pa kubibira katundu wawo. Mabanki ghanyakhe ghasweka na bankhungu bafuti ndipo ndalama zinandi zaluta. Ine nkhuyowoya pano banibirapo batire la galimoto kabiri kose na kuniswera windo la galimoto panyumba!

Nkhani za kwiba na futi zikufulembeka dazi na dazi mumanyuzi ghithu.

Sabata yeneyiyi iyi pa Mande apa, yumoza mwa basambizi ba bola mu timu ya Silver Strikers, Hellings Mwakasungula, bakamutimbira pageti la nyumba yakhe ku Area 36 ku Lilongwe na kumupoka chibeta (chikwama) cha ndalama apo wakati waka khire galimoto ya munyakhe uyo wakizakamuthula panyumba. Pano nthena bakuti mulomo na jiso vili ntchwi, kutupa ndipo wakuchita kugontha pakwenda.

Kasi ukhaliro ungaba nthena, bina Malawi? Madazi ghano nanga ungimba foni ku 997 pala bankhungu bakunjirira munyumba, ukutayapo waka nyengo yako. Bakuleka na kwizako! Zgolo likuba lakuti “tilije mazaza, nase tikopa kupalamula!” Bakiti, charo chikuyankhu ichi! Bapolisi bambe kopa bankhungu? Tiponenge nthena?

Lekani sono banthu nawo mitima yafumamo. Pala bakora munkhungu bakumalana nayo bekha. Nthena nkhuyoboya pano ku Blantyre sabata yeneyiyi iyi, ku Nkolokosa na ku Mbayani bakakora bankhungu babiri ndipo banthu bakadyakamula mpaka thambalala! Kuluta ku chipatala bakuti mwiza na nyifwa!

Enya, banthu nawo sono vyalema. Bakumanya kuti bapolisi bangabovwira chara chifukwa cha mazgo agho Joyce Banda wakayowoya ghakubakanizga kugwiriska nchito futi, lekani nawo bakopa bankhungu bafuti. Kasi pala vinthu vili ntheura ndiko kuti pali kawemi nthena? Chivikiliro chilipo apa nthena? Yayi, palije.

Pachifukwa ichi, nkhusanga kuti Mama Joyce Banda wakatimbanizga pakuyowoya lubiro kuti bapolisi baleke kulasa bankhungu na futi. Uku kukakaba nga kupereka nkhongono kwa bankhungu kuti bibirenge banthu mwakufwasa, kwambura kopaso kuti kucharo kuno kuli bapolisi. Walipo uyo wangasuska nthena?