The Maravi Post

Masebero gha bola la malundi sono ghamba kunozga kuno ku Malawi. Madazi ghano pala kuli masebero agha, chomenechomene mu Supa Ligi, banthu banandi bakwiza kuti bizakawonerere. Pala bola lili pakati pa Big Bullets FC na timu yinyakhe ndipo kukwiza banthu banandi chomene.

Pala mungati mufumbe kuti banthu kakwizirachi banandi ntheura ku bola, zgolo ndakuti: Tikawonere Gabadinho Mhango, munyamata uyo lumbiri lwakhe lwaluta patali pa nkhani yakupalula chipapa.”

Enya mwana uyu wayata mbiri nadi chifukwa kose uko mungaluta mupulikenge banthu bakuyowoya vya mwana uyu wa vyaka vya pakati pa 18 na 20 kuti wasuzga nadi.

Pakwamba banandi bakatenge ‘Gaba’ nkhanyamaso uli, kweni muhanya uno banandi bagomezga kuti mu mwana uyu, nanga vyasukulu wali navyo kuyali, kweni pa bola ni katundu muzito.

Pakati apo vikapulikwikapo kuti munyamata uyu wakagwetha kulemba mayeso ghakhe gha JC (Junior Certificate) ndipo banandi vikabagongoweska chomene kuti sukulu wakuyikhumba chara. Kweni muhanya uno vyose vila vili kuluwika ndipo palipose banthu bakuti waka Gabadinho! Gabadinho! Gabadinho!’ chifukwa cha ivyo wakuchita na bola pala lati waka pakalundi kakhe khwa!

Nanga ni awo bakupereka ndalama zakwendeskera chiphalizgano cha Supa Ligi ba Telecom Networks Malawi (TNM) bamala nayo mahara mwana uyu pa ivyo wachita muchigaba chakwamba cha Supa Ligi mu timu ya Bullets.

Kulikose uko mungaluta mbiri nja Gabadinho pera. Banthu banandi bamba kutemwa kulabirira bola ya Supa Ligi sono chifukwa banyamata nga Gabadinho biza na malusi ghapya agho ghakunozgeska masebero gha bola. Apa vikulongola kuti vinthu vikwenda makora kwakuyana na chakulata chithu chakukwezga masebero gha bola mucharo chono cha Malawi,” wakati Wilma Chalulu, mulala wa TNM uyo wakubona vya chiphalizgano ichi pakuyoboya na nyuzipepala ya The Nation sonosono apa.

Kulongora kuti munyamata uyu ni katundu nadi pa bola, mwezi wamala uwu iyo ndiyo wakasankhika kukhala player-of-the-month kung’anamula kuti ndiyo wakaba nkhwantha pa bakusebera bola bose mu Supa Ligi ndipo njombi yakhe yikaba K15 000, foni yamukaboko na kankhombo kachoko.

Ni apo pera yayi—mu chiphalizgano cha Presidential Cup, iyo ndiyo wakatola nkhombo chifukwa cha kuhozga vigoli vinandi kuluska banyakhe bose.

Ndipo mwakujipepuska, munyamata uyu wakuwonga Chiuta chifukwa chakumupa luso pakupalura bola ndipo wakuti bina Malawi banozgeke kubona vyakuzizwiska kufuma kwa iyo kunthazi uku. Iyo chakulata chakhe akuti akukhumba kukhala kaswiri wa bola kuti matimu ghakulughakulu ku Mangalande na vyaro vinyakhe kusirya kwa Nyanja panji ghangamutola kuti wakalyeskenge njomba kwenekuko.

Nanga vya sukulu wakuti navyo uli?

Enya sukulu njakukhumbikwa nadi ndipo nili wakunweka kuti nilembe mayeso chaka chino. Kweni pakuti Chiuta walikunigabira chawanangwa cha kusebera bola, nkhumubonga nadi ndipo nilutilirenge kusebera bola mpaka apo nizamuvukira,” ndimo wakuzgolera nthena Gabadinho, uyo zina lakhe lakonkhera ni Gabadini.

Ndipo kulongola kuti msepuka uyu ni moto-moto ndipo ngwamasebera yayi pakupalura chipapa, Kinnah Phiri, msambizgi wa timu ya fuko la Malawi iyo yikuchemeka The Flames, walikumunjizga mu timu iyi ndipo wali na chigomezgo kuti pala wazgobera kusebera na banyakhe, mwana uyu wachitenge vyakupya nadi ndipo timu ya Ghana yibe nayo maso pala yikwiza kuno ku Malawi.

Add attachment