The Maravi Post

Dazi ilo banthu ba ku Mzimba bakalindizganga lafika—ni muhanya uno Pachibiri apo basolenge bimiliri ba ku Mphara ya Malango mu vigaba vya Mzimba Central na Mzimba South West. Visola ivi nvyakukhumbika chomene chifukwa vigawa ivi vyangubavya bimiliri (ma MP)—ku Mzimba Central uyo wakaba mwimiliri, Prof. Donton Mkandawire walikupotera ndipo ku Mzimba South West uyo wakaba mwimiliri wakhe Khumbo Kachali sono ngwachibiri kwa Pulezidenti wa charo chino. Malango ghakukana kuti usange ndiwe pulezidenti panji wachibiri kwa pulezidenti ukhaleso mwimiliri wa chigaba mu Mphara ya Malango.

Banthu mitima yili dyokodyoko chifukwa visora ivi vilongorenge kuti banthu balipokelera uli boma la Mama Joyce Banda. Mwakudumula tingati waka visora ivi vili pakati pa chipani cha People’s Party (PP) icho chikuwusa sono na Democratic Progressive Party (DPP) icho chikawusanga kale pambere mlongozgi wakhe Bingu wa Mutharika wandapotere mwezi wa Epulero chaka chino.

Chipani cha DPP sono chikulongozgeka Peter Mutharika, uyo ni munung’una wa chiponde Bingu. Pachisulo chajumpha ichi kukaba kolani-kolani ku Mzimba apo kampeni yikafika pachinyina ku Mzimba South West apo masapota gha vipani vibiri ivi ghakakhumba kulungirana mafayiti bati chifukwa chakujandana musewu.

Uyo wakuyowoyera chipani cha DPP Nicholas Dausi wakaphalira batolankhani kuti ba PP ndiwo bakambiska vyose pakujanda musewu kuti baleke kuluta kukachita kapeni kuchigaba cha Mzimba South West, kweni mulala wakuwona vya chisora ichi mu chipani cha PP, Frank Mwenifumbo wakuti mbutesi ndipo nayo wakulongora kamunwe kwa ba DPP kuti ndiwo bakaba na mtima wakwavya.

Unenesko weneko pa awo bakambiska viwawa ukumanyikwa makora chara chifukwa waliyose wakukanira munyakhe, unenesko ngwakuti vipani vibiri ivi vyatungana pa visola vya ku Mzimba ivi chifukwa vilongolerenge kuti kasi chipani chakutemweka chomene pakati pa PP na DPP ni nchi? Visola ivi vikuchitika apo banthu banandi mucharo cha Malawi bamba kutaya chigomezgo mu boma la PP pasi pa ulongozgi wa Mama Joyce Banda chifukwa nkhani za chuma zikwenda makora vibi chara; banthu ukavu ukulutilira panthazi chifukwa cha kuchepeska nkhongono ndalama ya kwacha na 49%. Mitengo ya mafuta, vyakulya na vinthu mumasitolo njakuti ungayiganga cha madazi ghano ndipo banthu bakukumbuka Bingu kuti wakabaso muwemi kujumpha Joyce Banda pa nkhani za kendeskero ka chuma cha boma. Kweniso pala banthu bakumbuka vya mizere ya mafuta na kusowa kwa ndalala za kugulira katundu wakuwalo (forex) nyota yose yakuti bangavoteraso DPP yikumala.

Mwantheura vipani vibiri ivi vichenjere chomene na awo mimilira pabenkha (independents) chifukwa bangatindika vipani ivi. Enya, kuli vipani vinyakhe ngati Aford na NRC ku Mzimba Central kweni unenesko ngwakuti vinunkhenge kanthu chara umu vikuwonekera. Kweni pakuti voti yili mu mtima wa munthu, tose tilindizgenge waka kuti kasi vyendenge uli ku Mzimba? Ivi vichitikenge paumaliro wa visola ivi vilongolenge pakweru kuti mwanalume ni njani pakati pa PP na DPP chomenechomene pala tikughanaghanira visola vya ma MP na Pulezidenti ivyo vizamuchitika mu chaka cha 2014.

Add attachment