The Maravi Post

MZUZU--Mulala wa wupu wakwendeska vya visola mucharo chino cha Malawi (Electoral Commission), Anastasia Msosa, muhanyauno Pachitatu waphalazga mazinga gha awo basoleka kuba bimiliri ba ku Mphara ya Malango pa visola vyapadera ivyo vikachitika muvigaba vya Mzimba Central and Mzimba Southwest Pachibiri.

Nangauli banthu banandi awo bakalembeska kuti bizamuponya voti pa visola ivi bakatondeka kwiza, bachoko awo bakafuma muzinyumba zawo na kuvota ku chigaba chapakati (Mzimba Central) bakavotera Joseph Mabvuto Kachali (wambula chipani) na mavoti 9,412.

Ku Chigaba cha kumwera chakuzambwe (Mzimba Southwest)bakasankha Raymond Chatima Nkhata wa chipani cha People’s Party (PP) na mavoti 9,654.

Bachipani icho chikalamulanga kale cha DPP bakawerapo fyopo pavisola ivi, kung’anamula kuti banthu ba Kumpoto, awo m’chaka cha 2009 bakavotera chipani ichi na pasi gone, madazi ghano malije nacho luzo.
Pakuphalazga vyakulondezga vya visola ivi pa boma, Msosa wati nangauli banthu banandi bakatondeka kuponya voti pavifukwa vyakumanya bekha, chakukondweska nchakuti mwa awo bakavota, 80% bakaba banakazi. Kweniso chakugongoweska nchakuti mwa banthu khumi awo bakayima pavisola ivi ku Mzimba Central na ku Mzimba Southwest, mwanakazi wakabapo yumoza pera, Enita Njolwa, wa Alliance for Democracy (Aford), uyo wayima ku Mzimba Central.

Chikusuzga nchivichi kuti banakazi baleke kuyina nawo pavisola ngati ivi? Bavipani na imwe mose mukukhwaskika, chonde mbudindo winu kuwoneseska kuti banakazi nawo batolengepo lwande pakwendeska
charo.

Pala tingabaso na visola vinyakhe vyapadera (fyaaa ziwuluke!) nkhukhumba kwizakawona kuti mawupu na vipani  vikuchiska banambumba kuti bizakayime nawo,” wakadidimizgapo nthena Msosa.

Mama uyu wakahaya awo bakaluska pavisola ivi ndipo wakalunjikizga awo bakatondeka kuti baleke kusinginika chifukwa pachiphalizgano panji pachisola, mose mungaluska chara, wakuluska wakuba yumoza pera.

Wakawongaso bose awo bakayima nawo pavisola ivi chifukwa chakuchita kapeni yambula kuthiska ndopa nga umo vikuchitikira muvigaba vinyakhe uko banthu bakutemana na kutemana panji kuswerana magalimoto.

Ku Mzimba Central kukaba kwambula MP kufumira apo uyo wakabapo, Professor Donton Mkandawire wakati watayika, apo ku Mzimba South West, MP wa chigaba ichi, Khumbo Kachali, wakasankhika kuba wachibiri kwa pulezidenti wa charo chino.

Mavoti ku Mzimba Central ghakenda mwantheura:

- Aram Mdala Wedson Beza, wa People’s Party, (mavoti 8,154)
- Joseph Mabvuto Kachali, wambula chipani, (mavoti 9,412)
- Owen Mkandawire, wa DPP, (mavoti 2,313)
- Dennis Kandodo Mvula, wambula chipani, (mavoti 55)
- Bonfancio Ngulube, wa New Rainbow Coalition, (mavoti 18)
- Enita W. Njolwa, wa Aford, (mavoti 341)

Ku Mzimba Southwest mavoti ghakaba ntheura:

-         Leonard Chavula, wa DPP, (mavoti 3,210)
-         Baxter Mazunda, wambula chipani, (mavoti 219)
-         Raymond Chatima Nkhata, wa PP, (mavoti 9,654)
-         James Nthara, wambula chipani, (mavoti 4,636).

Apa tingati banthu, chomenechomene muvigaba vya Mzimba Central na Southwest, sono chakumutima chawa chifukwa bajisankhira bekha balongozgi, panji titi bimiliri bawo ba ku Mphara ya Malango.

Awo bandavoteko bazomerezge khumbo la awo bakavota ndipo baleke matukutuku chifukwa palije uyo wakabakanizga kulembeska na kuvota usange bakabavye vyakubakanizga kuchita ntheura.

Mzimba loyooo!