The Maravi Post

MZUZU--Pala chipani chakulamula chafumamo mu boma chikumala nga ni makatani. Mazgo agha ghakutikumbuska mazgo gha mlongozgi wakale wa charo chino, Bakili Muluzi, agho wakayowoya wakati waka khalepo pachitengo cha ulongozgi apo wakagadabula Ngwazi Dr. Kamuzu Banda pavisola vyakwamba vya matipate mu chaka cha 1994.

Penyengo yira, mwachigozola na mwachimwazga nadi, Muluzi wakati: “Chipani cha Malawi Congress Party (MCP) chimalenge nga ni makatani...

Enya nadi, kufuma nyengo yira mpaka muhanyauno pano, mulongozgi wa chipani ichi, John Tembo, wakuyezga kuti wasonelere umu na umu kuti panji chingabaso chankhongono, kweni vikutondeka; chilikubauka posepose!
Bakale bakati kuseka nkhwambula. Pala Muluzi wakaghanaghananga kuti chipani chakhe cha United Democratic Front (UDF) chikhalirirenge kuwusa, mbwe wali kutondwa.

Apo nyengo yakhe yakuwusa charo cha Malawi yikati yamala—apa nga watondeka kunyengerera bina Malawi kuti bamuzomerezge kuti walutulizge kuwusa apa vyaka 10 vikati vyakwana—wakasankha dala Bingu wa Mutharika kuti ndiyo wanjire mumalo mwakhe. Mumaghanoghano ghakhe, Muluzi, nga mulala wa chipani cha UDF, wakatenge chizamuba chipusu kumuphalira panji kuchichizga Mutharika chakuchita. Wamanyenge!
Pakajumpha na nyengo wuwo yayi mbwenu Mutharika wagaluka na kwamba chipani chakhe cha Democratic People’s Party (DPP).

Mu chaka cha 2009 pavisola vya Pulezidenti na bimiliri ba ku Mphara ya Malango (Presidential and Parliamentary General Elections) banthu mucharo chino bakavotera Mutharika na chipani cha DPP na pasi gone!
Chomene Kumpoto ndiko balaluska, ma MP ghose ghakaba gha DPP kupatula chigaba chimoza pera ku Karonga uko bakavotera Khwauli Msiska wa hipani cha Aford.

Vyakulondezga vya visola ivi vikamukwezga nkhumbi Bingu ndipo nayo wakakwera pachiduli na kuyowoya mwachimwazga kuti chipani cha UDF nacho chamala nga ni makatani ngati umo chikamalira cha MCP!
Bakuti chawona munyako chaluta, namachero chili pa iwe. Muhanyauno ninga? Nyifwa yikudumula nadi mwe! Manyi nyifwa yikafumira nkhu, banganya? Mu April chaka chino apo Bingu wakati nagona pano, chitimbaheti nacho chikamba kunjira mu chipani cha DPP.

Banthu abo bakalyanga makora mu chipani ichi, bakamba kuyaghayika ndipo banandi maso ghakaba pa chipani icho bakachinyozanga cha People’s Party (PP) cha wachibiri kwa mlongozgi wa charo chino Mama Joyce Banda, uyo kwakuyana na malango wakahalira pachitengo cha Pulezidenti.

Banandi bakaphalikamo mu chipani cha DPP na kunjira mu chipani cha PP. Kwasonosono apa tapulika kuti mphanda zibiri zagumphuka mu chipani ichi.

Chinkhondi chamala icho mulembi mulala wa DPP Elias Wakuda Kamanga wakaphalazga kuti wafuma muchipani ndipo wanjira PP kuti wovwirane na boma pa nchito yakukwezga charo. Juzijuzi apa tapulikaso kuti wachibiri wakwamba kwa pulezidenti (first vice-president) wa DPP, Goodall Gondwe, nayo wati vyandyali wavithula pasi, kung’anamula kuti wafumamoso mu chipani.

Mphwepwerezga zikuti Pulezidenti Banda wakukhumba kusankha Gondwe kuti wabe nduna yakwendeska vya chuma mumalo mwa Ken Lipenga. Gondwe wali na lumbiri lakwendeska chuma cha boma makora apo wakaba nduna muboma la Bakili Muluzi. Vinthu vikamba kusuzga apo bakamuwuskapo pa mpando uwu na kubikapo Ken Kandondo.

Pali tuwemi apa nthena? Pala mphanda zakukhola na zakuzirwa ngati izi ndizo zagumphuka, chipani cha DPP chigamirenge nkhu sono? Mbumaliro yayi uwu?

Kweni chakuzizika nchakuti mumalo mwakusekerera kuti banthu bakufuma mu chipani cha DPP ndipo bakunjira mu PP, wachibiri kwa uyo wakuyowoyera chipani cha PP, Ken Msonda, wakuti ivi sono vyamba kofya chifukwa muwuso wa demokilase uli pa chofyo.

“Usange ivi vikulutirira mbwenu tiwererengeso ku muwuso wa chipani chimoza,” wakayowoya ntheura Msonda pakuyowoya na nyuzi ya The Nation sabata yino.

“Pala munthu wakukhumba kovwirana na boma, chikung’anamula kuti waleke chipani chakhe chara. Ise nga chipani chakuwusa tikukhumba vipani vyakususka boma vibe vyankhongono ndiposo vyafundo ziwemi kuti vitovwire kwendeska charo chino mwakunowera bina Malawi wose.

“Banthu baleke kupusikizgira kuti bakukhumba kovwira boma pakuleka vipani vyawo chifukwa demokilase yikwenda makora usange mu charo muli vipani vyankhongono vyakususka panji kunjirikizga boma pakendeskero ka nchito zakhe,” wakati nthena Msonda na kupereka chiyerezgero cha Ibrahim Matola na Atupele Muluzi (ba DPP), Khwauli Msiska na Enoch Chakufwa Chihana (ba Aford) awo ni nduna mu boma la PP.

Msonda wakuneneska, kweni nkhumanya chara usange banyakhe bamulabiskenge na jiso liwemi chifukwa pandyali chipani chilichose chikugomezga mzinda wa banthu.

Apa kweni unenesko ngwakuti DPP nayo sono yimalenge nadi nga ni makatani. Pala katani yafeda na kubauka, nanga bangati ulikumanya kusona uli mwe, yikuweleraso mwakale chara.

Kweni kasi apa tingatolapo chisambizgo uli?

Uyowoyero pala takwera pachiduli tiyowoyenge makora, mwaganyavu chara, chifukwa mazgo ghakuwelera, ndipo timanye kuti kuseka nkhwambula hee!